Arrinca OlloBoi 2025 cun programa raivosamente optimista destinado a levarnos a primeira división: non vos podemos desvelar aínda as novidades, pero sabede que recuperamos o noso espírito de celebración e xuntanza, e participar vai ser unha experiencia que non ides esquecer!
Desde agora ata o 18 de maio, todos os centros educativos e persoal vencellado ós mesmos (alumnado, familias, docentes, ex-docentes, PAS) podedes enviar as vosas curtas. Nesta mesma web tedes o formulario para inscribirvos, así como un histórico das edicións anteriores e materiais educativos para crear curtas na aula.
O venres 6 de xuño celebraremos a festa. De 10.00h a 14.00h recuperamos a Muchachada, un encontro entre cineastas, escolas e veciñanza de Boiro do que xurdirán micropezas realizadas nesa mesma mañá. Pola tarde teremos música, proxeccións e a xa tradicional entrega de premios, que volve á fantástica localización da Abadía de San Enrique.
Vai haber moitas actividades paralelas, pero disto, e da forma de inscribirvos na Muchachada e na entrega de premios, iremos falando andando as semanas. Agora... Non perdades un minuto en poñer o voso ollo en modo Ollo-BOI!
CATEGORÍAS A CONCURSO
- Olloboi Peque (2 premios): para traballos elaborados con alumnado de Infantil e Primaria. O premio é un trofeo e un obradoiro de animación no centro de ensino.
- Olloboi ESO (2 premios): diploma, obradoiro de curtas e inscrición automática na Muchachada Olloboi para o alumnado responsable da peza, debidamente documentado nos créditos. A Muchachada Olloboi é unha oportunidade única para traballar xunto a artistas de prestixio no panorama de cine galego. Aportaremos, ademais, unha axuda para custos de desprazamento.
- Olloboi BAC/Ciclo medio (2 premios): diploma, obradoiro de curtas e inscrición automática na Muchachada Olloboi para o alumnado responsable da peza, debidamente documentado nos créditos. A Muchachada Olloboi é unha oportunidade única para traballar xunto a artistas de prestixio no panorama de cine galego. Aportaremos, ademais, unha axuda para custos de desprazamento.
- Olloboi Plus18: para pezas elaboradas por alumnado de centros de ensino superior (escolas universitarias, ciclos de formación profesional superior, EOI, etc.), profesorado ou PAS. O premio (individual ou coral) é a xestión de asistencia a unha rodaxe profesional.
- Olloboi PT: para curtametraxes enviadas desde Portugal. O premio, que se fallará con antelación, é un convite para asistir ó noso festival, con aloxamento, e un trofeo.
Entre as curtas participantes no concurso, seleccionaranse ata un máximo de TRES que terán dereito a asistir ó 26 Encontro de escola e cinema do Festival internacional de Viana de Castelo (maio do 2026, gastos de aloxamento e manutención están incluídos.)
